Na Mwandishi wa OTR

 

Tanga. Ofisi ya Msajili wa Hazina (OTR) imezitaka mamlaka za majisafi na usafi wa mazingira nchini kuiga mfano wa Mamlaka ya Majisafi na Usafi wa Mazingira Tanga (Tanga UWASA) katika kutumia vyanzo mbadala vya fedha, ikiwemo sekta binafsi na jamii, kufadhili miradi ya kimkakati na kupunguza utegemezi wa fedha za Serikali.

 

Wito huo ulitolewa Jumatatu, Oktoba 5, 2026, na Msajili wa Hazina, Bw. Nehemiah Mchechu, wakati wa ziara ya kutembelea Mradi wa Kuboresha Hali ya Upatikanaji wa Maji Tanga Awamu ya Tatu kupitia ufadhili wa Hatifungani ya Kijani yenye thamani ya Sh53.12 bilioni iliyotolewa na Tanga UWASA.

 

Utekelezaji wa mradi huo umefikia asilimia 80, ukilenga kunufaisha wakazi takribani 600,000 wa Jiji la Tanga pamoja na Miji ya Muheza na Pangani.

 

Hatua hiyo ya Tanga UWASA ya kutumia Hatifungani ya Kijani imeiweka Mamlaka hiyo katika nafasi ya kipekee, ikiwa ni taasisi ya kwanza ya maji nchini Tanzania na katika ukanda wa Afrika Mashariki kufanikiwa kupata na kuorodhesha hatifungani hiyo kwa ajili ya kugharamia miradi ya majisafi, majitaka na uhifadhi wa mazingira.

 

Akizungumza wakati wa ziara hiyo, Bw. Mchechu, aliyeambatana na Menejimenti ya OTR, alisema mafanikio hayo yanaonesha namna taasisi za umma zinavyoweza kutumia ubunifu katika kutafuta fedha na kutekeleza miradi bila kutegemea pekee fedha kutoka Serikali Kuu.

 

Alisema matumizi ya vyanzo mbadala vya fedha kwa taasisi nyingine za maji yanaweza pia kuisaidia Serikali kuelekeza fedha ambazo zingetumika kugharamia miradi hiyo kwenye maeneo mengine ya maendeleo.

 

“Tunaiangalia Tanga UWASA kwa wivu mkubwa kutokana na jinsi inavyofanya vizuri. Tunataka taasisi zote za maji kuiga mfano wa Tanga UWASA,” alisema Bw. Mchechu.

 

Alimpongeza Mwenyekiti wa Bodi Dkt Fungo Fungo na Menejimenti ya Tanga UWASA kwa mafanikio hayo, akisema mamlaka hiyo ni miongoni mwa taasisi 308 ambazo OTR inasimamia.

 

Matokeo ya ubunifu huo wa kutafuta fedha tayari yanaonekana katika Mradi wa kuboresha hali ya upatikanaji wa huduma ya maji awamu ya tatu, ambao utekelezaji wake ulianza Oktoba 12, 2024.

 

Ukiwa na thamani ya Sh53.12 bilioni, mradi huo unatarajiwa kukamilika Novemba 30, 2026, kwa mujibu wa Kaimu Mkurugenzi Mtendaji wa Tanga UWASA, Mha. Salum Ngumbi.

 

Alisema mradi huo unahusisha upanuzi na ukarabati wa Mtambo wa Kutibu Maji wa Mowe, upanuzi wa kituo cha kusukuma maji cha Mabayani, upanuzi wa mtandao wa usambazaji wa maji na hatua za kupunguza upotevu wa maji yasiyoingiza mapato.

 

Mha. Ngumbi alisema miongoni mwa kazi zinazotekelezwa ni ulazaji wa bomba kubwa lenye kipenyo cha milimita 600 kutoka Mabayani hadi Mowe kwa urefu wa kilomita 6.4, pamoja na upanuzi wa kituo cha kusukuma maji cha Mabayani ili kufikia uwezo wa kusukuma mita za ujazo 72,000 za maji kwa siku kutoka mita za ujazo 42,000 za sasa, kupitia ufungaji wa mashine nne za kusukuma maji zenye uwezo wa mita za ujazo 1,500 kwa saa kila moja.

 

Mtambo wa Mowe nao unapanuliwa kutoka uwezo wa kutibu na kuzalisha maji kwa mita za ujazo 45,000 hadi kufikia mita za ujazo 60,000 kwa siku.

 

Mradi huo pia unahusisha upanuzi wa mtandao wa usambazaji wa maji kwa kilomita 60, pamoja na ununuzi na ufungaji wa mita 10,000 za maji za malipo kabla kwa ajili ya kudhibiti upotevu wa maji na kuimarisha ukusanyaji wa mapato.

 

Kwa upande wa majitaka na uhifadhi wa mazingira, Mha. Ngumbi alisema mradi huo unahusisha uendelezaji wa mtandao wa majitaka kwa urefu wa kilomita 1.5, ukarabati wa bomba la majitaka lenye urefu wa kilomita tatu katika eneo la Ngamiani, pamoja na shughuli za uhifadhi kwa ajili ya uendelevu wa Mto Zigi.